Botelyang buak giluba sa liog

Giliog og dunggab sa botelyang buak ang usa ka lalaking nangagda sa suspek og inom tungod lang sa gamay'ng panaglalis diha sa Purk 3 sa Camputhaw ning dakbayan kagahapon sa kaadlawon.

Ang naliog sa botelyang buak mao si Reynaldo Payao,42, usa ka negosyante ug residente sa maong dapit human siya gidunggab sa silingang si Expidito Dinglasa, 55.

Sa imbestigasyon sa Homicide Section, nasuta nga giagda sa biktima ang suspek diha sa ilang grupo samtang nag-inom tungod kay nag-inusara ra ang suspek nga nagtagay sa iyang bino.

Tuod man mirespetar ang suspek sa pangagda ug nakigtimbaya sa pag-inom apan dangtan pila ka gutlo mitumaw ang panagsumpaki sa duruha hangtud nga misangpot sa sinumbagay.

Atol sa kaguliyang nakapunit og botelyang buak ang suspek ug giduslak sa tuong bahin sa liog, tuong pulsohan ug tuong bahin sa lawas ni Payao.

Si Payao daling gitabang sa mga kainom nga mga higala ug gidala sa Cebu City Medical Center samtang ang suspek nadakpan ra dayon sa mirespondeng polis diha sa maong lugar.