Hugaw-hugaw sa bongbong i-monitor

Hugot nga gibantayan sa mga barangay tanod ug kapolisan ang pundok sa mga batan-on nga magpataka lang og sulat sa pintal sa mga bongbong ug mga koral sa daplin sa dalan nga malabyan sa ceremonial route sa 12th Association of Southeast Asian Nation (Asean) Summit sa sunod semana.

Kini ang gipadayag sa Banat News ni Kapitan Editha Flores Cabahug sa Looc, Mandaue sa pagpakighinabi nga gihimo kagahapon.

Matud pa niya nga nalakip sa mga dalan nga malabyan sa ceremonial route sa Asean Summit sa Looc mao ang dalan Plaridel ug mga eskina A. C. Cortes Avenue, eskina sa dalan Catalino Ouano.

Gipasabot ni Cabahug nga ang vandalism ordinace sa dakbayan higpit nilang gipatuman ug kini maoy ilang basehan sa pagduso og kaso sa korte alang niadtong madakpan sa akto nga maghimo sa maong kalapasan.

Samtang si Mayor Thadeo Ouano nga gikahinabi sa Banat News miingon nga ang kalimpiyo sa kadalanan nga nalakip sa ceremonial route sa Asean Summit gitinguha niyang mamintinar.

Ang nalakip sa ceremonial route nga mga dalan sa Asean Summit mao ang United Nation Avenue sa Marcelo Fernan Bridge sa Alang-Alang ug Umapad, dalan J. Plaridel Avenue sa Cambaro ug Looc, S. B. Cabahug Extention sa Tribunal Centro, Ouano Avenue sa Mantuyong, C.D. Avenue ug M. C. Briones Avenue sa Tipolo ug Guizo.