Opisyal sa Phil. Army gibato sa silingang nagmaoy

Usa ka opisyal sa Philippine Army naangol human maigo sa paglabay og bato sa iyang silingan sa miaging gabii sa sitio Anakma sa Pagsabungan, Mandaue.

Ang biktima mao si 1st Lieutenant Paulgencio Escaberte, 32, ulitawo nga sakop sa Central Command ug nagpuyo sa nahisgotang lugar.

Ang suspetsado mao si Jojet Castillon, 31, minyo nga nagpuyo usab sa maong dapit.

Si SPO1 Edgardo Pasaylo sa Presinto 3 sa Basak Police Station nga gikahinabi sa Banat News miingon nga gialegar sa biktima nga nahigmata siya sa mihagtok nga bato sa ilang balay.

Migawas ang biktima sa pagsusi kon diin gikan ug sa pag-ila sa tawo nga nagpunay og panglabay og bato kanila.

Sa paggawas sa biktima maoy naabtan ang suspetsado kinsa hubog ug nag-wild nga ang kontra mao ang ilang mga silingan.

Dihang nagpaila ang biktima nga opisyal sa Army wala kini maminaw hinuon gipadayon niini ang pagpamato hangtod nga naigo ang bitiis sa biktima.

Si SPO1 Pasaylo miingon nga nangayog panabang ang biktima kang Labogon Barangay Kapitan Cecillo Congson apan wala gayod mopatuo nga maoy nakaaghat sa biktima sa pagdangop sa kapolisan.