Proyekto alang sa mga barangay sa Manduae gipundohag P50 milyones

Mokabat sa P50 milyones ang gahin sa kagamhanan sa dakbayan sa Mandaue alang sa pagpatuman sa mga gitinguhang programa ug proyekto sa kabarangayan sa 2007.

Si Mayor Thadeo Ouano nga gikahinabi sa Banat News miingon mokabat sa P4.5 milyones nga kantidad alang sa pagpalambo sa environment program sa dakbayan ang gigahin.

Matud pa niya nga ang pundo gibase sa gisugyot nga proyekto ug programa subay usab sa Annual Investment Plan (AIP) sa tuig 2007.

Nalakip sa maong mga proyekto ang pagpalit og yuta sa barangay Umapad nga mokabat sa P600,000 ang kantidad alang sa pagwagtang baho sa basora nga moabot sa Marcelo Fernan Bridge.

Sumala pa ni Ouano nga mokabat usab sa P800,000 ang gahin alang sa rehabilitasyon sa water treatment plant ug mga ekipo sa ihawan sa barangay Labogon.

Dugang pa niini ang pangpalimpiyo ug pagsemento sa kilid nga creek ug Butuanon River sa dakbayan nga mokabat sa P1 milyon.

Laing P500,000 ang igahin alang sa composting facility nga ipahimutang sa barangay Casili.

Si Ouano mipasabot nga ang maong mga programa ug proyekto nga gitinguha niyang ipatuman sa sunod tuig.