Ang biktima mao si Arcenio Daugdaug, 45 anyos, minyo ug napuyo usab sa maong dapit, samtang ang gitumbok nga mibugha sa ulo sa biktima mao si Allan Cotillar, hingkod ang panuigon ug barangay tanod sa maong dapit.
Si PO1 Vivian Tamayo nga gikahinabi sa Banat News miingon nga human sa pagpanigbas mismong ang tanod pay miadto ug mipahibalo kang barangay Kapitan Reynaldo Dayag ingon man sa ig-agaw nga barangay tanod nga si Rolando Cotillar kabahin sa iyang nabuhat sa biktima.
Matud pa ni PO1 Tamayo wala dayon motuo si Kapitan Dayag apan mihimo kinig pakisusi sa maong dapit kuyog sa iyang mga barangay tanod.
Dugang pa ni PO1 Tamayo nga napalgan na lang nila ni Kapitan Dayag ang biktima nga nagluko sa kasagbutan nga nag-agulo ug naligo sa kaugalingong dugo.
Si PO3 Ely Pelayo, imbestigador sa kapolisan sa maong lungsod miingon nga naglingkod lang sa waiting shade ang biktima sa maong dapit dihang kalit lang gitigbas sa suspetsado.
Ug nakamatikod ang biktima ug dali kining nakasagang sa tuo niining kamot nga maoy hinungdan nga naputol.
Giusban sa pagtigbas sa suspetsado ang liog sa biktima apan dali usab nga nakahupo hinungdan nga ang ulo niini maoy naigo.
Dali nga gidala ang biktima sa San Isidro Kintanar Momorial Medical Center nga nahimutang sa maong lungsod apan gideklarar sa mga doktor nga patay na kining naabot kanila.
Ang suspek daling miikyas human mapahibalo ang kapitan sa iyang krimen, apan kagahapon nadakpan siya sa mga migukod nga mga polis nga sila si SPO4 Wilfredo Tautoan sa Cantolaroy sa lungsod sa Sibonga.
Ang suspek mitug-an sa mga polis nga iyang gibuhat ang krimen tungod sa pagbugal-bugal kaniya sa biktima ug wala na niya kini mapasensyahi hinungdan nga iya kining gibawsan.