Ang mga streamers nagkanayon og "Kami diri nagpulaw, si Leo nagpunay'g yawyaw," ug "Leo Lastimosa maayo pang manilhig ka" ug uban pang mga pulong nga pagpangatake batok ni Lastimosa.
Ang maong streamers walay nakabutang kun kang kinsang grupo kini naggikan apan dunay mga trabahante sa CICC mitug-an nga dunay mga tawong wala nila mailhing mibutang sayo pa sa buntag.
Apan ang nakapahingangha, mismong ang mga gwardiya diha sa maong edipisyo wala makabadlong ug wala motangtang sa maong mga streamers hangtod nga nagsugod na ang dry-run ug naabot na si Gobernador Gwendolyn Garcia pagkaudto dihang natapos ang unang hugna sa dry-run.
Si Gobernador Gwendolyn Garcia dihang gihinabi sa Banat News mihimakak nga may kasayuran siya sa maong mga streamers ug mitug-an nga posibleng mga sakop sa PEACE, mga empleyado sa Kapitolyo ang mipasiugda niini.
"I think ang PEACE raman ana," asoy pa sa gobernador kinsa midugang nga sa kadugayan iya ra ning ipatangtang apan wala moklaro kun kanus-a.
Dugang pa sa gobernador nga pag-abot niya kagahapon nabutang ng daan ang maong streamers.
Si Lastimosa maoy usa sa mga mibira og maayo sa proyekto sa CICC nga maoy giisip sa gobernador nga labing dakong proyekto karon sa lalawigan. Gisulayan og kuha ang reaksiyon ni Lastimosa apan pakyas ang Banat News.
Lakip sa mga gikomentaryuhan ni Lastimosa mao nga kung magamit ba gyud kini atol sa ASEAN Summit.
Lakip sa gilisud-lisod sa mga gwardiya nga nagbantay sa ganghaan sa CICC mao ang mga sakop sa media nga walay napakitang accreditation paper gikan sa mga tigpasiugda.
Kagahapon ang mga sakop sa PNP-Defense Press Corps pinangulohan ni Dennis Tabar wala dayon pasudla kini bisan kabahin ang grupo nga nagsunod sa pagkober sa gihimong dry-run sa mga convoy.