Ang dry-run nagsugod alas 7 sa buntag ug natapos sa pagka-alas 11 sa buntag ug gibalik pagka-alas 2:30 sa hapon hangtud sa alas 4 sa hapon diin pipila ka mga pribadong sakyanan ang nangatanggong ilabi na kadtong diha mag-agian sa ceremonial route.
Ang kapolisan misuway og kuha sa tukmang oras ug gikusgon sa dagan sa mga convoy kagahapon sa matag delegasyon gikan sa airport ngadto na sa mga hotel sa Lapulapu, Cebu City ug CICC.
Si General Leo Alvis, over-all security task force commander kinsa maoy nag-obserbar sa dry-run luwan sa helicopter nagkanayon nga dunay mga nakit-ang lapso sa convoy.
Usa na niini ang lain-laing gikusgon sa dagan sa mga sakyanang mikuyog sa convoy, dunay paspas ug dunay hinay og dagan, samtang duna say nakitang mga choke points nga kinahanglan og dugang mga enforcers sa dalan.
Kini mao ang mga dalan Plaridel sa Mandaue, United Nations Avenue diha sa may tiilan sa karaang Mandaue- Mactan bridge, sa may agianan sa North Reclamation area sa habig sa Sugbo ug Salinas Drive.
Matud pang Alvis nga kinahanglang parehas ang dagan sa convoy, kung diha sa tarmac sa Mactan Benito Ebuen Airbase diin manukad ang mga delegado, kinahanglang 20 ngadto 40 ka kilometro matag oras ang dagan sa convoy aron di malangay.
Samtang diha na sa main route mahimong mopadagan ang convoy gikan sa 100 ngadto sa 120 kilometro matag oras ang gikusgon sa convoy aron dili matanggong og dugay ang mga motoristang nagpaabot nga makatabok.
Si Police Regional Office 7 Director Silverio Alarcio,Jr. sa iyang bahin nagkanayon nga hapsay ug malampuson ang kalihukan apan duna pay mga kinahanglanon kaayong i-adjust, lakip na sa ubang mga motorcycle cops nga wala makatultol asa padulong.
"It is a successful dry-run, we have not disrupted much, but some motorcycle riders must know where you are going because there are lots of convoys who are roaming around," asoy pang Alarcio.
Si Chief Deputy for Operations ug National Security Task Force Commander on Asean Summit General Isidro Lapeña mihangop sa gipakitang kooperasyon sa mga Sugboanon sa kalihukan kagahapon.
"I'm happy to know that the people of Cebu cooperated well and we are hoping that they will do the same during the summit," asoy pang Lapeña sa mga tigbalita kagahapon.
Samtang si Ambassador Marciano Paynor, ang secretary general sa national organizing committee sa Asean summit nagkanayon nga nakatabang og dako ang media sa pagpahibalo sa publiko sa kalihukan kagahapon.
"From what we saw on the first run traffic is not affected much, first maybe because it's holiday and the people are well informed of what would happen," pasabot pa niini.
Ang tanang task force commanders mipahibalo usab ang duna pay laing dry-runs ning mosunod nga mga adlaw apan kini di na susama kadako sa kagahapon sanglit matag task group mao nay mohimo sa ilang kaugalingong dry-run aron mahimoan og kausaban ang kinahanglang usbon.