Abadinas OIC sa Mandaue

Miasumer kagahapon isip officer-in-charge sa Mandaue City Police Office (MCPO) ang kanhi hepe sa Police Community Relation Office 7 nga si Sr. Supt. Alexander Abadinas.

Si PNP Chief Supt. Silverio Alarcio mitug-an sa Banat News nga si Abadinas mao una ang mohulip sa pwesto ni Catabas samtang wala pa makapili si Mayor Thadeo Ouano sa lima ka mga opisyal nga papilian sa mayor.

Si Abadinas matud pang Alarcio lakip sa maong lima ka mga opisyales nga papilian apan ang upat dili pa niya ikabutyag samtang wala pa sila magkaatubang og personal sa mayor.

Si Catabas buot nga pahulipan ni Ouano tungod kay nawagtangan na kini og pagsalig sa maong opisyal isip direktor sa MCPO.

Kini dihang wala kini makasulbad sa mga krimen sa dakbayan lakip sa pagpatay sa manager sa bangko, suliran sa fraternity, kinawatay sa kuryente ug ingon man ang bag-ohay lang nga insidente sa Cebu International Convention Center diin nakalusad og rally ang mga militanteng grupo.

Si Abadinas nga gikahinabi sa Banat News miingon nga usa ka dakong hagit kaniya ang pagdumala sa kapolisan sa Mandaue nga maoy sentro sa kalihukan sa 12th Association of Southeast Asian Nation Summit.

Si Abadinas sa wala pa madestino sa buhatan sa PCR sa Police Regional Office 7 maoy kanhi deputy director for administration sa MCPO ug naghupot pa sa ranggo nga Superintendent.

Sa milabay'ng bulan sa Oktobre niining tuiga lang siya na-promote pagka-full fledge Sr. Supt. nga ranggo.

Si Alarcio daan ng mibutyag sa Banat News nga ang ibutang sa MCPO kadtong duna nay kasinatian sa pagpangandam sa summit, samtang si Catabas kinsa ibutang sa Security Service Group sa PRO7 gamiton gihapon sa summit.