'Badlungon' misaka sa balay, nangluba

Patay ang usa ka lalaki human kini gisulod sa iyang silingan ug gidunggab samtang natulog sa iyang gamay nga payag sa miaging gabii sa Sitio Labangon, Binongkalan, Catmon.

Ang kapolisan mihulagway sa suspek nga usa ka badlongon sa ilang dapit, kusog moinom ug permi nga manghingi aron lang ikapalit og ilimnong makahubog, gani kapila na kini magbalik-balik sa prisohan tungod sa kasong pagpangawat.

Si SPO3 Romulo Torralba sa Catmon, miila sa biktima nga si Genio Cole 55, ulitawo ug nagpuyo sa maong dapit.

Samtang ang gitumbok nga suspek kinsa hubog atol sa paghimo sa kremin mao si Julieto Gaco, 22, ulitawo ug silingan sa biktima.

Ang biktima nag-inusarang nagpuyo sa gamay'ng payag nga maoy gihimong katulganan matag gabii.

Ang inahan sa biktima miasoy ngadto kang SPO3 Torralba nga samtang siya nahinanok pagkatulog kalit lang nakamata tungod sa kasaba ug kasikas nga iyang nadunggan sa pikas payag.

Daling gisusi sa inahan ang payag apan maoy iyang nakita ang biktima nga nagpugong na sa pus-on gumikan sa samad dinunggaban nga naangkon.

Matud ni SPO3 Torralba dako pa unta og kahigayonan nga mabuhi ang biktima kun nadali pa kini pagdala sa tambalanan gani nakasulti pa sa nagdunggab kaniya hinungdan sa pagkasikop sa suspetsado.

Nasayran usab nga ang suspek pirmeng mangayo og kuwarta sa biktima aron ipalit og bino kay nagtuo kining sapian ang biktima.

"Kadaghan naman ni mapriso puro kawat sa hayopan, diha pay kaso ani niya nga gipatay ang hayopan sa silingan, basta kay badlungon lagi kaayo." Dugang asoy ni Torralba.