Pari sa Cathedral gikawatan

Usa ka pari sa Cebu Metropolitan Cathedral gikawatan human gisulod ug gilungkab ang iyang kuwarto sa wala pa mailhing tawo kagahapon sa kaadlawon.

Apan nahibaw-an sa biktima nianang alas 12:30 dihang gikan pa siya sa lakaw ug gituohang gisulod kini sayo pa sa kagabhion.

Ang bikitma mao si Rev. Roy Bucay, 32, Parochial Vicar sa Cebu Metropolitan Cathedral.

Nakuha nga butang gikan sa biktima mao ang usa ka laptop computer "Red Fox Navigation" nga nagkantidad og P45,000.

Base sa imbestigasyon sa Theft and Robbery Section sa Cebu City Police Office pinaagi ni SPO2 Edgar Galado nasayran nga ang biktima gikang milakaw ug sa iyang pag-abot sa maong simbahan mideritso siya og sulod apan nakasirado ang pultahan sa atubangan hinungdan nga iya kining gipugos og abli.

Sa dihang nakasulod na ang biktima iyang nahibaw-an nga gipanglakan ang tanang pultahan sa wala mailhing kawatan ug nawala na ang nahisgutang butang.

Ang scene of crime operation (SOCO) ug ang kapolisan sa CCPO mikuha na og latent print sa kuwarto sa biktima aron mailhan ang responsable niini.