Alahas, sobrang make-up idili na sa mga maestra

Ang pagsul-ob og daghang mga alahas ug sobrang baga nga make-up sa mga maestra, higpit nang gidili ni Kalihim Jesli Lapus sa Department of Education.

Matud pa ni Lapus nga kutob sa molapas sa "dress code" kon balaod bahin sa matang sa senina sa magtutudlo sa tunghaang iya sa gobiyerno, pahamtangan sa tukmang silot.

Ang maong matang sa pamarog sa usa ka magtutudlo nga puno sa alahas ug baga'g make-up dili matawag nga "professional," matud pa ni Lapus ug nagpamubo kini sa kredibilidad ug presentihiyo sa mga magtutudlo ug kawani sa DepEd.

Gipalanog ni Lapus ang maong pasidaan tungod sa daghang mga pagsaway nga iyang nabati gikan sa publiko sa mga magtutudlo ug kawani sa DepEd didto sa buhatang sentral niini sa Manila.

Nakaingon si Lapus nga mas professional pa ang hitsura sa mga maestra sa probinsiya kay sa tua sa buhatang sentral sa DepEd.

Gusto ni Lapus nga subayon ug tumanon gyud ang gitawag nga "professional dress" sa mga magtutudlo nga gilatid sa DC.

Busa higpit niyang gipasidaan pag-usab ang pagdili pagsul-ob sa mga maestra sa mga nipis ug sihag kaayong mga blouse, sando, strapless o spaghetti dress, micromini shirts, walking shorts, cycling shorts, tights ug jogging pants.