Cellsite gikawatan

Cellsite sa Globe Telecom gikawatan og mga cable wires sa Saac II, Buaya, Lapu-Lapu sa milabay'ng hapon.

Si Mervin Caberte, 18, nagpuyo sa maong dapit ug caretaker sa cellsite sa Globe sa naasoy'ng dapit, miasoy sa kapolisan nga wala mabantayi ang pagsulod sa wala mailhing kawatan.

Matud pa ni Caberte atol sa imbestigasyon sa mga sakop sa Theff and Robbery Section nga didto miagi sa luyo nga bahin sa cellsite ang kawatan human giputol ang barbed wire sa koral.

Nakuha sa mga kawatan ang ground wires, 4x8 ground terminal bronze plate ug mga cable wires sa maong cellsite diin gibanabana kini nga mikabat sa P70 mil ang kantidad sa nakuha sa mga kawatan.

Hinuon padayon pa nga gi-follow up sa mga sakop sa TRS ang maong insidente.