Mga hepe, Gayotin subling paatubangon sa PCAC

Subling ipatawag sa Police Coordinating and Advisory Council (PCAC) ang hepe sa Cebu City Police Office Supt. Melvin Gayotin ug ang mga station commander sa nagkalainlaing presinto sa Disyembre 10, besperas sa upat ka adlaw nga Asean summit.

Matud ni Bise mayor Micheal Rama, tsirman sa PCAC, nga nianang higayona iyang sukdon ang katakus ug kaandam sa kapulisan sa pagpatunhay sa kahusay ug kalinaw sa maong kalihukan nga tambungan sa presidente sa nagkalainlaing kanasuran dinhi sa Asya.

Gitug-an ni Rama dihang nahinabi sa mga tigbalita nga pagkakaron dili pa gyud siya kuntento sa gipakitang ka-andam sa kapulisan alang sa umaabot nga kalihukan bisan pa man duna kini ayuda nga mga sakop sa militar ug Philippine Marines nga gipadala dinhi sa dakbayan atol sa maong summit.

Matud ni Rama makuntinto lang siya sa maong mga gihimong pagpangandam kun mahuman ug malinawon nga magmalampuson ang maong kalihukan.

Giangkon ni Rama nga naghatag og dugang labad sa ulo ug mas daku nga responsibilidad sa kapulisan ang pag-usab sa Malacañang nga pagkanselar sa upat ka adlaw nga holiday atol sa maong summit.

Kini tungod kay mas mosamot kadaghan ang mga tawo nga bantayan sa kapolisan ug militar ning maong higayona aron pagsiguro nga walay si bisan kinsa nga dautang elemento o terorista nga molampus pagmugna og kagubot atol sa maong okasyon.

Tungod niini, subling nanawagan ang bise mayor ngadto sa publiko nga mokooperar kutob sa mahimo pinaagi sa pag-report kun dunay mga tawong kadudahan og linihukan nga mamatikdan aron masumpo sa kapolisan ang mga dautang plano niini.