2 mangingilad nadakpan

Duha ka mga gidudahang mga mangingilad nangadakpan sa mga sakop sa Theft and Robbery Section sa Cebu City Police Office human makabiktima sa managlahing hitabo.

Ang nadakpan niadtong Lunes sa hapon mao si Robinson Salem, 38, taga dalan N. Bacalso Avenue sa Pahina Central ning dakbayan human siya pangitaa sa TRS tungod sa reklamo sa usa ka Julie Bitang, residente sa Sambag 2.

Si Bitang miduol sa tulo ka sakop sa CITOM anti-jaywalking task force nga sila si Michael Garces, Benjamin Cañete ug Conrado Silva diha sa eskina sa P.Lopez ug Colon aron magpatabang pagpangita asa makapalit og baterya sa trak.

Mitug-an si Bitang sa mga enforcers nga dunay wala mailhing lalaking miduol kaniya nga nagpatabang pagpangita og baterya ug hatagan siya og P200 kung makakita asa makapalit niini.

Matud pa sa biktima nga gitunulan siya og sobre sa suspek nga ang sulod P2,000 apan nangayo kaniya og garantiya nga dili niya idagan ang kwarta maong iyang gibilin ang iyang cellphone ngadto kang Salem.

Apan human itug-an ni Bitang sa mga enforcer ang ilang kasabutan, nagduda na dayon ang tulo maong ilang gimando nga paablihan ang sobre diin nasutang P20 ra ang sulod niini ug ang uban pinutol nga mga papel.

Dali untang gibalikan sa grupo ang dapit diin ang suspek giingong ulahi niyang nakit-an. Ang suspek niadtong tungora nagsakay na og usa ka PUJ sa biyaheng Guadalupe.

Tungod sa traffic nagdagan lang nga gigukod sa grupo ang suspek hangtud nga kini diha sa usa ka traffic light. Ang mga tawo human mahibaw-ing mangingilad si Salem daling mikuninit kaniya hinungdan sa grabeng mga bun-og niini.

Nakuhaan ang suspek og usa ka paketeng shabu niadtong tungora hinungdan sa dugang kasong ipasaka batok kaniya.

Samtang sa laing bahin usa ka babayeng gipasanginlang mangingilad ang nadakpan human niini ilara ang duha ka mga babaye diha sa eskina sa Samson Road ug Gorordo sa Lahug.

Ang gidakop mao si Eden Tampus Menchavez alyas Edang, atol sa follow-up operation sa TRS pinanguluhan ni SPO3 Alejandro Lopez diha sa North Bus Terminal sulod sa usa ka mini-bus nga padulong sa Sogod.

Ang mga biktima giilang sila si Janice Ricaplaza Aguilar, 22 ug Marie Catherine Apao Sayson,14, pulos taga Riverside, Sudlon ning dakbayan kinsa giilad sa suspek sa pagpapangita og trak nga makargahan og buwad.

Matud pa sa mga biktima gihangyo sila sa suspek nga papangitaon og trak ug gibilin ang usa ka pitaka nga giingong may sulod sa dakong salapi apan nangayo kanila og butang nga ikagarantiyang di nila idagan ang kwarta.

Si Aguilar mitunol sa iyang cellphone samtang pitaka ni Sayson nga may sulod nga P70 mao usab ang iyang gigarantiya sa suspek, dali usab nga milakaw ang suspek aron mangita og trak samtang gipapaabot ang duha.

Apan dangtan og pila ka gutlo wala gihapon mobalik ang suspek hinungdan nga ilang giablihan ang pitaka nga ang sulod pinutol ra nga mga newspaper.

Ang suspek positibong giila sa mga biktima diha sa litrato ug dihang nadakpan na kini.