BJMP-7 mao ray agdon

Gibarugan sa Police Coordinating and Advisory Council (PCAC) tsirman bise mayor Micheal Rama ang iyang nahaunang pamahayag nga dili gyud motabang sa Bureau of Jail Management and Penology (BJMP) kabahin sa planong pagbalhin sa mga piniriso sa Bagong Buhay Rehabilitation Center (BBRC) ngadto sa Kalunasan tungod sa umaabot nga Asean Summit karong bulan sa Disyembre.

Matud ni Rama husto na ang mga nahimong tabang sa siyudad ngadto sa BJMP pagdumala sa maong bilanggoan ug panahon na usab karon nga ipakita niini ang ilang katakos pagsulbad sa problema.

Si Presidente Gloria Arroyo maoy nimando ngadto sa BJMP nga ipabalhin ang mga priso ngadto sa Kalunasan tungod sa umaabot nga Asean Summit gumikan kay duol ra ang maong bilanggo-an sa Waterfront hotel nga maoy usa sa mga hotel nga abtan sa mga delegado ug peligro kun dunay jailbreak o ba kaha noise barrage nga himuon ang mga piniriso kun dili mabalhin.

Si BJMP-7 regional director Benito Dorigo una nang nipahibalo nga posibling dili mahinayon ang transfer sa BBRC sa petsa 30 karong bulana tungod sa pagsupak sa mga opisyal sa barangay Kalunasan nga adto sa ilang lugar magkuha og tubig nga magamit sa mga piniriso ug supak sab si mayor Tomas Osmeña nga gamiton ang mga sakyanan sa siyudad aron mohakot og tubig alang sa mga binilanggo.

Apan alang kang Rama nga nahinabi sa mga tigbalita kagahapon nga paabuton lang niya hangtud sa katapusan karong bulana kun mahimo sa BJMP ang hangyo sa Presidente pagbalhin sa maong bilanggo-an.