Pasko sa Carbon himuon

Mopahigayon og bargain sale ang mga manindahay sa Carbon ngadto sa tanan niining mga baligya karong petsa 23 og 24 sa bulan sa Disyembre agi ug pagtimaan sa paglusad sa programa nga "Carbon Pasko na".

Ang maong kalihukan nga gipasiugdahan sa Cebu City United Multi Sectoral Coordinating Council (CCUMCC) gitumong aron pagdani og paghatag og kahigayunan sa mga Sugboanon nga makapalit og mga baratong palaliton karong pasko.

Atol sa press conference kagahapon sa udto, gibutyag ni Joni Chan, project chairman sa maong kalihukan, nagtambayayong silang tanang mga negosyante sa Carbon ug ang mga street traders nga gahinan og panahon ang pagsaulog og pasko diha sa Carbon.

Atol sa pormal nga pagbukas ning maong kalihukan sa petsa 1 karong Disyembre usa ka Santos nga Misa ang ipahigayon sa alas 4:00 sa hapon diha sa Unit-I carbon Market og sundan kini sa parada og dayon ang pagsuga sa duha ka dagkong Christmas tree nga nahimutang diha sa Unit-I ug Unit-III.

Mosunod ang paghatag og mensahe sa pasko ni Mayor Tomas Osmeña og dayon ang "carbon tour" nga molibot sa tibuok carbon area nga pangulohan ni mayor Osmeña ug bise mayor Micheal Rama.

Matud ni Chan dili na-angay'ng mahadlok ug mabalaka ang mga mangomprahay sa Carbon tungod kay estrikto na ang siguridad nga gipatuman batok sa mga esnatser ug mangunguot, ingon man limpyo na ang palibot gikan sa hugaw nga basura.

Matud ni bise mayor Rama, chairman sa maong kalihukan nga tumong niini aron madani og balik ang mga Sugboanon nga mobalik pagpangompra sa maong lugar tungod sa mga kalambuan nga napatuman niini.

Giangkon ni Maria Pino Buanghug sa project and Production nga labing unang higayon pa kini nga nagkahiusa silang mga street traders sa Carbon nga magmugna og proyekto sa pasko ug ihikling lang una ang kompetisyon tungod ug alang sa pasko.