Aboitiz Foundation midonar og 12 ka mga computer sa Kapolisan

Kompleto na ang sistema sa "computer" sa kapolisan alang sa hingpit nga pagbantay sa umaabot nga ASEAN Summit.

Kini sa dihang gihatag sa Aboitiz Foundation ang 12 ka mga computer servers ngadto sa Cebu Provincial Police Office niadtong Biyernes sa buntag didto sa Aboitiz Complex sa Banilad ning dakbayan.

Si CPPO Provincial Director Senior Supt. Vicente Loot miingon nga ang maong mga hardware server maoy naghingpit sa ilang pagpangandam alang sa pagkutlo og mga impormasyon ilabi na ning umaabot nga ASEAN Summit.

Matud pa ni Loot nga kining maong mga server nga mobalor og P700,000 gamiton sa monitoring nga kalihokan sa kapolisan sa tanang lugar nga himoan sa mga miting sa mga lider sa ASEAN ug bisan ang mga kadalanan nga ilang subayon, ug tanang lihok nga naa sa palibot nila, masud-ong sa dakong kasayon pinaagi sa kahimanan sa mga computer nga anha i-estalar sa Tactical Operations Center sa CPPO.

Midugang si Loot nga pinaagi sa kakompleto na karon sa ilang sistema sa computerization, tanang mga kalihokan sa 51 ka mga estasyonan sa kapolisan sa tibuok lalawigan masayran na sa buhatan sa CPPO sa lalawigan.

Kini tungod kay matag usa ka estasyon sayon kaayong masud-ong sa Computer nga nia ra sa buhatang panlalawigan sa CPPO nga di na magkinahanglan ang mga hepe sa kapolisan og papel para sa ilang report adlaw-adlaw.

Ang tanang mga kasayoran ilabi na bahin sa kriminalidad sama sa tulis, patay ug uban pa, sayon kaayong masagop ug masayran sa buhatan sa CPPO pinaagi sa gitawag nga "Internet Protocol Virtual Private Network" IPVPN.