4-day holiday exemption gihangop apan...

Mahinangpong gidawat sa pribadong sektor sa pamuo ang deklarasyon sa Malacañang paghatag og kagawasan sa mga pribadong sektor gikan sa ASEAN Summit holiday.

Apan nagkahiusa ang taga Kilusang Mayo UNO KUNO ug Trade Union of the Philippines Alliance Services (TUPAS sa ilang hangyo ngadto sa "organizer" sa summit nga ipaklaro lang ang tukmang mga oras nga buksan alang sa mga trabahante ug katawhan ang mga ceremonial routes.

Ang mga ceremonial routes, maoy agianan tali sa Lapu-Lapu City Mandaue City ug Cebu City diin maoy bahas-bahasan sa tanang delegado sa ASEAN Summit.

Sumala sa pahibawo, gikan sa alas 7:00 sa buntag hangtod sa alas 10:00 sa gabii pagatakpan sulod sa duha ka oras matag adlaw gikan sa Disyembre 11-14 ang ceremonial route.

Matud pa ni Jaime Paglinawan sa KMU ug ni Marianito Vintura sa Tupas nga kinahanglang masayran nila kun unsang orasa tak-opan ug ablihan ang maong mga karsada aron makaagi usab ang mga sakyanan sa mga trabahante nga way kahasol.

Nasayran nang daan nga may 160,000 ka mga pribadong trabahante ang apiktado ning maong upat ka adlaw nga holiday sa ASEAN Summit.

Hinuon mapasalamaton lang gihapon ang sektor sa pamuo tungod kay dili sila mawad-an og pamugas, kay kun nahinayon pang ilakip sila sa maong holiday, maglisod sila sa ilang panginabuhi kay dako kaayo ang mawala nilang suweldo, matud pa ni Vintura.

Apan sa bahin ni Paglinawan, gusto unta niyang mapahimuslan pa sa mga trabahante ang 30 porsyentong usbaw sa suhol sa mga trabahante kay bisan unsaon gideklarar man gyud ang upat ka adlaw nga ASEAN Summit.

Maoy hinungdan nga si Paglinawan mitakdang makigtagbo gyud sa mga organizer sa ASEAN Summit aron kahisgotan nila kining maong isyu.