Hepe sa polis gidakop

Hepe sa lungsod sa Aloguinsan nasikop sa mga sakop sa Provincial Police Intelligence and Investigation Branch human kini giingong misuway sa paglaban sa iyang kabit niadtong Biyernes sa gabii diha sa Barangay Poblacion, Aloguinsan.

Si Police Inspector Edgar Almaden kinsa gipasanginlang nanion sa iyang pusil ngadto ni SPO1 Kenneth Labella mag-atubang og kasong obstruction of justice ug direct assault nga ipasaka sa biktima batok kaniya.

Gikataho nga ang mga sakop sa PIIB mi-serve og warrant of arrest ngadto ni Rosalyn Dosdos, giingong kabit ni Labella kinsa adunay kasong grave oral defamation ug grave threat.

Ang warrant of arrest sa grave oral defamation naluwat niadtong Disyembre 2005 ug ang grave threats niadtong Abril niining tuiga ni Judge Dante Manreal sa Municipal Circuit Trial Court in Cities (MCTCC) sa Bogo-San Remigio.

Sila si Labella, PO2 Zeusito Veloso, PO2 Artemio Tumakay ug PO1 Shirley Bade ang misikop ni Dosdos.

Si Almaden gikatahong ubos sa impluwensiya sa ilimnong makahubog ug positibo kini sa liquor test dihang nahitabo ang insidente diin gipasanginlang mibabag sa mga sakop sa PIIB sa ilang pagsikop ni Dosdos ug mikabat sa usa ka oras una mitugot ang suspetsado nga mokuyog sa mga polis.

Si Dosdos giubanan ni Almaden diin sakay sila sa pirbadong sakyanan ni Veloso lakip na ang nahisgutang mga arresting officer apan pag-abot nila diha sa Brangay Borbon sa maong lungsod mihulbot si Almaden sa iyang service firearm nga 9 mm pistol ug gition ngadto sa tuong bahin sa lawas ni Veloso hinungdan nga gipahunong niini ang sakyanan ug nanganaog sila.

Mikabat sa tunga sa oras ang gihimong negosasyon sa nahisgutang mga polis ngadto ni Almaden para ibutang niini ang iyang pusil.

Gisakmit sa mga polis ang pusil ni Almaden nga dunay duha ka magazine diin matag magazine dunay sulod nga 30 ka buhing bala.

Apan si Almaden mihimakak sa mga pasangil batok kaniya dihang nahinabi kini sa Banat News kagahapon.

Matud ni Almaden nga gihangyo niya ang mga polis nga misikop ni Dosdos nga Lunes na i-serve ang warrant para makapiyansa dayon ang suspetsado ug dili matanggong sa detention cell.

Ug dili tinood nga nanion siya sa iyang pusil, iya lang kining gihulbot tungod kay wala kini masulod sa holster ug sakit kaayo ang iyang bogan.

Si Almaden midugang nga makig-istorya siya ni Police Provincial Director Vincente Loot kabahin sa maong insidente apan kung pasakaan gyud siya og reklamo iya na lang kining atubangon.

Si Loot sa iyang bahin, miingon nga ipaubos pa sa imbestigasyon si Almaden diin ang Provincial Internal Affairs Service (PIAS) maoy mopahigayon niini.

Matud ni Loot nga si Almaden ubos sa technical arrest apan pwede gihapon siyang maka-report sa duty bisan og gipaubos kini sa imbestigasyon.

Ang Provincial Director midugang nga ubos usab sa camp restriction si Almaden ug kung mapamatud-an nga nakahimo kini og kalapasan pasakaan gyud kini og kaso.