Ang kalihukan gitambungan ni Gobernador Gwendolyn Garcia, Foreign Affairs Usec. Frank Benidicto, Ambassador to Malaysia Victoriano Lecaros, PRO-7 Regional Director Chief Supt. Silverio Alarcio Jr., Tourism Usec. Fenias Alburo, Mandaue Chamber of Commerce and Industry President Eric Mendoza ug Mandaue City Mayor Thadeo Ouano.
Matud pa ni Ouano nga ang panagtigum gitumong paghatag sa mga Mandauehanon sa kaimportante sa Asean summit ug ang angayang buhaton atol sa upat ka adlaw nga panagtigum sa mga delegado karong Disyembre.
Atol sa panagtigum, si Alburo mipadayag nga siyento porsiyento nang andam ang tanang mga hotel ug resorts nga kapuy-an sa mga pamuno nasud human nila gihimo ang inspeksiyon niini.
Gipaneguro ni Alburo isip maoy in-charge sa hotel accommodation sa mga delegado nga hapsay ug hamugaway ang pagpuyo sa mga delegado dinhi sa Sugbo.
Samtang si Alarcio mipasalig nga walay dautang mahitabo sa mga delegado atol sa maong kalihukan gumikan kay lakip sa ilang gihimoan og pagtuon mao ang pagbantay sa mga delegado nga dili mabiktima sa mga ginagmay'ng krimen sama sa panguot, labni ug lungkab samtang wala kini sa ilang gipuy-ang mga hotel ug resorts.
Bugtong problema ni Alarcio mao ang mga aktibista nga maghimo og protesta atol sa maong kalihukan gumikan kay dili lamang ang gikan sa Sugbo ang mohimo og rally kun dili aduna usab silay nasayran nga dunay mga langyaw nga aktibista nga moapil sa maong lihok-protesta.
Gumikan niini, si Alarcio mihangyo sa mga Mandauehanon nga dili magpadala sa pagpangumbinser sa mga aktibista nga mosalmot sa ilang lihok-protesta atol sa upat ka adlaw nga panagtigum.