Mga developer walay kumpletong rekisitos

Mga developer sa gipangtungkod nga subdivision sa Talisay wala makakumpleto sa ilang mga rekisitos.

Si Bise Mayor Aberdovey Belleza mibutyag nga adunay sobra sa 60 ka subdivision ang natukod diha sa dakbayan.

Si Belleza mipasangil nga ubang mga developer sa maong mga subdivision wala makatuman sa ilang mga mga rekisitos sa kondisyon sa ilang development permit.

Ang bise mayor mimando sa City Planning Development Coordination (CPDC) sa pagmonitor sa mga subdivision sa siyudad.

Gitataw ni Belleza nga ipahunong ang development sa usa ka subdivision kun mapamatud-an kining wala makakumpleto sa ilang mga rekisitos.

Adunay ubang mga subdivision nga ang ilang mga "waste water" deretsong ilabay sa mga culvert tungod kay wala kini drainage system ug ang mga "waste water" anha modagan sa karsada nga makahatag og kahasol sa ubang mga lumolupyo.

Si Christine Homez hepe sa CPDC nagkanayon nga padayon silang nag-monitor sa mga subdivision sa siyudad pagpiho sa mga taho kabahin sa giingong mga kalapasan sa developer.

Gitataw ni Homez, nga kasagarang mga subdivision sa siyudad mga simple subdivision lang kini ug natukod sa wala pa siya sa serbisyo.

Si Homez kinsa milingkod sa serbisyo niadtong 2002 midungag nga adunay mga "mitigating measure" ang ilang gipatuman ngadto sa mga developer ug ila usab kining gi-monitor kun mituman ba ang mga hingtungdan.