Minilyon gigahin para pahimsog

Mas gipalapdan pa ang programa sa kagamhanan sa siyudad sa Sugbo nga migahin og minilyon ka pesos pag-atiman sa kahimsog sa panglawas sa mga tinun-an sa publikong tunghaan sa elementarya ug sekondarya dinhi sa dakbayan.

Sayo karong bulana miabot og 9,881 ka mga bata nga nagtungha sa nagkalainlaing day care center dinhi sa dakbayan nga nagpangidaron pa og 3 ngadto sa 5 anyos ang nakapahimulos sa gilusad nga deworming program.

Mokabat sa 147 ka mga day care center dinhi sa dakbayan ang gipangsuroy sa mga health workers aron panghatagan og mga deworming tablets ang mga bata aron mahatagan og proper hygiene ang mga kabataan.

Ang Department of Social Welfare and Services (DSWS) pinangulohan ni Cathy Yso maoy gitahasan ni Mayor Tomas Osmeña nga mopatuman ning maong programa pag-atiman sa panglawas sa mga tinun-an.

Niadtong bulan sa Septiyembre dul-an sa usa ka gatus ka libo ka mga tinun-an sa elementarya ang napurga sa programa nga "Gubat batuk Bitok" gikan sa 68 ka mga pampublikong tunghaan sa elementarya dinhi sa dakbayan.

Ubos ning maong programa panghatagan og libreng tag 500 mg tablet nga chewable mebendazole (Antiox) ang matag tinun-an aron mao kini mopatay sa bitok nga naghatag og hulga sa panglawas sa mga kabataan hinungdan nga kanunay kining magluya ug makabalda sa ilang pagtuon.