Direktor sa imigrasyon mi-deny nangilkil og P200T

Si Bureau of Immigration and Deportation-7 Director Geronimo Rosas mihimakak sa bag-ong alegasyon kaniya nga nangilkil sa usa ka negosyanteng Chinese balor og P200 mil.

Matud pa ni Rosas nga dakong tumotumo ang nalatid sa affidavit nga giluwatan sa reklamante. Base sa reklamo nangayo si Rosas og P200 mil bugti sa pagpasulod sa maong mga Chinese nationals dinhi sa Sugbo.

Hinuon miangkon si Rosas nga dunay duha ka Chinese nationals nga miabot dinhi sa Sugbo niadtong Nobiyembre 13 mga 7:00 sa gabii luwan sa Cathay Pacific gikan sa Hong Kong nga naila niyang sila si Deng Minwei ug Cai Zhouzhi.

Gumikan sa kalapasan sa balaod sa imigrasyon dinhi sa nasud ubos sa Sec. 29 (a)(5) nga naglatid nga usa ka "public charge" ang langyaw nga walay kasayuran kun asa padulong o kinsa ang abtan sa Sugbo, hinungdan nga gihukman dayon nga ibalik ngadto sa airline company alang sa pagpabalik niini ngadto sa iyang nasud nga gigikanan.

Gawas pa niini, nasuta nga buot kini mopauli sa bulan sa Agosto sa tuig 2007 diin nakalapas usab sa lagda sa extention process sa usa ka langyaw nga gitugotan lamang sa pagpuyo sulod lamang sa 21 ka adlaw isip mga restricted aliens hinungdan sa pagduda sa immigration officer nga nadestino sa Mactan Cebu Internationl Airport ug pag-isyu niini og Order of Exclusion aron makasakay dayon sa eroplano nga iyang gisakyan nianang adlawa ug wala nay higayon nga makapakita pa kini sa iyang buhatan sa BID-7 sa Mandaue.

Subay niini, gihagit ni Rosas ang reklamante nga si George Tan nga makigkita kaniya ug kun matumbok niini nga nagkita gyud sila nianang adlawa si Rosas.

Gipasalig ni Rosas nga kun mamatud-an ang pasangil batok niya, dihadiha dayon moluwat sa iyang katungdanan.

Si Rosas nagduda nga lain na usab kini nga demolition job batok kaniya ug wala siya mahadlok sa maong kaso nga gipasaka sa Ombudsman-Visayas gumikan kay iya kining atubangon aron masayran kun kinsa ang nagsulti sa kamatuoran.

Kahinumduman, si Rosas gipasakaan na usab og kasong kalapasan sa Anti-Graft ubos sa RA 3019 ni Tan, usa ka negosyante, gumikan sa giingong pagpangayo niini og P200 mil ngadto sa duha sa mga Intsik.