Asean summit kanunay gi-ampo

Ang kalinaw ug kalampusan sa 12th Association of Southeast Asian Nation (Asean) Summit karong Disyembre maoy giampo kanunay ni Ricardo Cardinal J. Vidal, Arsobispo sa Sugbo.

Kini maoy nalakip sa iyang wali atol sa misa sa kapistahan sa Mahal nga Birhen sa Regla, patron sa dakbayan sa Lapulapu niadtong miaging adlaw.

Matud pa niya nga ang mga lokal nga kagamhanan sa Sugbo migahin og salapi alang sa pagpangandam pinaagi sa pagpamintal ug pagpananom og misitas sa kadalanan.

Dugang pa niya nga kini gihimo aron sa pagpakita nga matahom ang palibot sa Sugbo sa pagsud-ong sa mga bisita gikan sa kanasuran sa Asya nga mohimo og panagtigum nga gitumong alang sa kalinaw ug kalamboan sa katawhan.

Gipasabot niya nga ang kalambuan gikan sa Asean Summit sama sa simbahan sa Birhen sa Regla nga milambo ug nadugangan ang iyang mga parokya nga naglakip sa Marigondon, Pajac ug Mactan sa maong dakbayan.

Gumikan sa maong paglambo sa simbahan sa Birhen sa Regla maoy gipaabot nga karong bulan sa Enero sa sunod tuig mahimo na kining National Shrine.

Ang deklarasyon pagahimuon human usab sa panagtagbo sa mga Obispo.