Kaso ni Loot gi-dismiss na diay

Pipila ka adlaw human gikataho ning pamantalaan ang giingong pagpakatulog sa Sandiganbayan sa kasong kriminal nga giatubang ni Daanbantayan Mayor Maria Luisa Loot usa na ka tuig ang nakalabay, migawas ang kopya sa desisyon nga nagbasura sa kaso sa miagi pang buwan.

Ang kopya sa desisyon nga nadangat ning pamantalaan gipetsahan og Oktubre 12, 2006 ug gipirmahan nilang Associate Justice Norberto Geraldez, Associate Justice Godofredo Legazpi ug Associate Justice Efren dela Cruz.

Human naduso sa Ombudsman-Visayas ang kasong kriminal ngadto sa Sandiganbayan, si Loot nakaduso og Omnibus Motion (for reconsideration, re-examination of the finding of probable cause, and to hold in abeyance the issuance of a warrant of arrest, or to lift the same if one has been issued) gumikan sa mga bag-ong ebidensiya nga iyang nahipos nga nagpahuyang sa kasong gipasaka sa iyang kawani sa munisipyo nga si Jeronimo Cosido.

Si Loot gipasanginlan ni Cosido nga nagdumili sa pagpirma sa iyang Daily Time Record hinungdan sa wala niya pagkadawat sa iyang suhulan sulod na sa tulo ka tuig.

Apan si Loot nimatuod nga walay tunga-tunga si Cosido sa trabaho apan duna kini DTR hinungdan nga wala niya kini pirmahi alang sa pagproseso sa iyang suhulan.

Sayo niini si Cosido nireklamo sa giingong pagbaliwala lang sa Third Division sa Sandiganbayan sa duha ka Indorsements ni Chief Justice Artemio Panganiban ingon man sa laing Indorsement sa Department of Justice nga gipirmahan ni Assistant Secretary Teresita Reyes-Domingo.

Si Loot nakapiyansa og P30,000 sa dihang dakpon na unta siya sa operatiba sa National Bureau of Investigation pinasikad sa warrant of arrest nga giluwatan ni Associate Justice Legaspi niadtong Nobiyembre sa niaging tuig.

Si Cosido kawani sa munisipyo sa lungsod sa Daanbantayan sa dihang nisang-at siya og kaso batok kang Loot niadtong Oktubre 8, 2003.