Sumala pa sa resolusyon ni First Assistant City Prosecutor Bienvenido Mabanto,Jr. dili paigo ang ebidensyang gipresentar sa CIDG7 batok nila ni Ruperto Navasca ug Roberto Juanico.
Ang duha gidakop niadtong milabay'ng Biyernes sa hapon diha sa Mantuyong sa Mandaue human usa ka nagpaila lang sa ngalan nga "Noreen" mitawag sa CIDG7 ug mitug-ang gikilkilan sila sa duha ka mga lalaking nagpailang mga sakop sa CIDG7.
Dihang gisusi, natino nga mga asset ang duha sa 701st Maritime Police Station nga nagbase sa Ouano Wharf sa maong dakbayan ug nakuhaan usab sila og usa ka kalibre 45 uban sa mga buhing bala ug usa ka Super .38 nga pistola ug mga bala.
Duna hinuoy napakitang lisensya ang duha apan wala makapakita og permit nga magtugot kanila nga makadala sa ilang armas gawas sa ilang balay.
Kasong paghupot sa armas ang gipasaka sa CIDG7 batok sa duha tungod kay ang mireklamo wala na mopatim-aw aron pagpasaka og pormal nga kaso.
Apan diha sa piskalya dunay gipresentar nga Letter Order nga dunay petsang Nobiyembre 1,2006 ang duha, pinirmahan ni Chief Inspector Ranulfo Sebusa nga nagmando kanilang mopahigayon og surveillance batok sa ilegal nga drogas ug smuggling diha sa Mandaue.
Nunot sa mga gipakitang balidong mga dokumentos sumala pa sa resolusyon paigo na kini aron sila pabuhian. Gimandoan usab ang CIDG nga ipauli ang ilang mga armas.
Si Chief Inspector Fermin Armendares III, ang team leader sa Criminal Intelligence and Detection Team (CIDT) nga maoy midakop sa duha mitug-an nga ilang susihon pinaagi sa ilang abogado nga si Atty. Inocencio dela Cerna kung unsay mahimo nilang legal nga aksyon kabahin sa pagka-dismiss sa kaso.
Ang duha daan ng gidepensahan ni Mayor Thadeo Ouano tungod kay iya kining mga consultants sa kampanya batok sa ilegal nga drugas diha sa ilang dapit ug kusganong mihimakak nga dili mga ekstorsyonista ang duha sahi sa alegasyon.