SPEED modawat sa kiha

Wala mahadlok ang kadagkuan sa City Hall demolition team nga pasakaan sila og kaso tungod sa pag-demolish sa mga tindahan nga nahimutang sa aseras sa dalan B. Rodriguez siyudad sa Sugbo niadtong miaging adlaw.

Si retired Major Vicente Mercado nga maoy pangulo sa Squatters Prevention Encroachment and Elimination Division (SPEED), miingon nga igo ra sila nga mituman sa kamandoan ni Mayor Tomas Osmeña.

Matud ni Mercado nga ang mga tindahan nga ilang gipangguba sa milabay'ng adlaw nakahasol sa mga lumalabay sa dalan B. Rodriguez kay anaa na kini magtungtong sa aseras.

Ang City Hall nakadawat og daghang reklamo gikan sa mga tawo nga pirmeng anaa mag-agian sa maong dapit ug miangkon nga nahasol kaayo sa maong mga tindahan.

Gibaliwala ni Mercado ang pamahayag sa mga tag-iya sa tindahan nga gisupak sa mga sakop sa demolition team ang kamandoan sa hukmanan nga dili usa ipahigayon ang demolition samtang wala pa maresolbar ang kasong civil tali kanila ug sa kapitolyo nga maoy mi-claim nga tag-iya sa maong luna.

Ang mga nanag-iya og carenderia nga apektado sa demolisyon mibahad nga mosang-at sila og contempt charges batok sa mga opisyal sa City Hall.

Apan gitataw ni Mercado nga wala sila'y labot sa pending nga kaso nga gisang-at sa mga tag-iya sa barung-barung ingon man mga tindahan nga anaa mahimutang sa yuta sa probinsya.

Ang gipasakaan og kaso mao ang provincial government nga girepresentahan ni Gobernador Gwendolyn Garcia.

Si Mercado miingon nga ang ilang gidemolis kadto rang anaa gitukod sa aseras ug wala sa yuta sa probinsya mao nga wala sila'y labot sa kaso nga pending karon sa hukmanan.

Ang kadagkuan sa City Hall miingon nga dugay na nilang gipahimangnuan ang maong mga tindera nga imentinar nila ang aseras aron dili mahasol ang mga lumalabay apan nagmagahi kini pagsanong sa maong pahimangno.