Abogado gihulgang patyon sa Amerikano

Usa ka Amerikano ug duha niini ka mga armadong bodyguard ang gipangita karon sa kapolisan human kini pasanginling misulong sa buhatan ni Atty. Inocencio dela Cerna diha sa Tango Plaza building sa Queens Road sa barangay Camputhaw ug gibaharang patyon ang abogado.

Sumala pang SPO1 Richard Catacutan ang imbestigador sa Fuente police station sa Banat News kalit nga misulod ang langyaw nga si Robert Browning diha sa iyang buhatan uban ang duha ka bodyguards niini ug gipasanginlan siyang "protektor."

"Dili man kasukol si Atty. Dela Cerna kay naa may duha ka armadong bodyguard, gihulga kuno siya kay niingon man og "I will kill you!"asoy pang Catacutan.

Human niini kalit nga gipangbungkag ni Browning ang mga butang sa abogado diin nangabuak ang mga bildong gamit, divider, mga bangko ug door knob sa pultahan lakip na ang iyang mga libro.

Wala makasukol si dela Cerna tungod kay dunay armadong kaubang bodyguard si Browning hinungdan nga mitawag nalang siya og polis apan pag-abot sa mga miresponde wala na diha ang mga suspek ug giingong luwan na og usa ka pajerong kolor puti nga may plakang GNX-923.

Si dela Cerna maoy legal consultant sa Criminal Investigation and Detection Group 7 ug nanag-iya og usa ka edipisyo diha sa dalan Sanciangko nga iyang gipaabangan diin giingong usa sa mga nag-abang mao si Browning kinsa nag-operate og internet café.

Gawas pa niini, duna say laing nag-abang nga internet café nga gikatahong maoy nahimong sinugdanan sa kagubot dihang ang tag-iya sa maong internet café mibutang og poster nga gisapawan usab og laing poster sa langyaw.

Tungod niini nahitabo ang panagbangi ni Browning ug ang laing tenant hangtud nga gihusay sila ni dela Cerna.

Wala usab matino kung kanus-a kini mahitabo apan gidudahang posibleng wala kauyon ang langyaw sa maong sitwasyon ug gisulong hinuon si dela Cerna.

Si Chief Inspector Rex Derilo sa CIDG7 kinsa miresponde usab mitug-an nga miingon pa si Browning kang dela Cerna nga "All Filipinos are monkeys" una pa milakaw.

Tungod niini naglaraw si dela Cerna nga modangop sa Bureau of Immigration 7 nga ideklarar nga undesirable alien si Browning ug pasakaan usab siya og kasong grave oral defamation, grave threats, damage to property ug maliscious mischief.