Pusher sa Suba gironda sa PDEA-7

Gironda sa mga sakop sa Philippine Drug Enforcement Agency (PDEA 7) ang panimalay sa notadong drug pusher kagahapon sa buntag diha sa dalan Abellana Suba ning dakbayan.

Nangulo sa maong operasyon si SPO1 Antonino Cabal uban nila ni PO2 Rayford Yap, PO2 Rey Robert Villarete ug ang hepe sa operation sa PDEA-7 nga si SPO4 Jesus Cabalda nga gibase sa search warrant nga giluwatan niadtong Nobiyembre 15 ni Judge Geraldine Faith Econg sa Regional Trial Court Branch 9.

Ang nasikop nga drug pusher mao si Feditha Abellana, 55, biyuda nga nagpuyo sa naasoy'ng lugar.

Atol sa maong operasyon wala diha ang anak ni Abellana nga si Teressa nga apil sa search warrant.

Nakuha nga mga ebidensya mao ang lima ka medium pack sa gituohang shabu ug laing lima ka putos sa shabu ug plastik pack nga gituohang sudlan sa ginadiling drugas ug ginamit nga tissue paper.

Ang ronda gisaksihan sa mga sakop sa media ug usa ka konsehal sa barangay nga si Roger Resurrection.

Si SPO4 Cabalda nga nahinabi sa Banat News kagahapon miingon nga mokabat sa duha ka semana nilang gi-surveillance si Abellana human sila makadawat og impormasyon kabahin sa pagpamaligya niini og drugas hangtod nga ila gyud kining gipalitan og medium pack sa shabu niadtong milabay'ng semana nga mikantidad og P1,000.

Matud ni Cabalda nga natala sa ilang watchlist si Abellana.

Dugang pa niya si Abellana maoy nihulip og pagpamaligya ug drugas sa iyang bana human mitaliwan sa laing kalibutan gumikan sa sakit.

Samtang si Abellana sa dihang nahinabi sa Banat News didto mismo sa iyang panimalay mihimakak sa mga nakuha nga shabu ug matud niya 'planted' sa mga sakop sa PDEA.