Fan ni Pacquiao namatay

Gumikan sa nanobrang kalipay sa kadaugan sa iyang paboritong boksidor nga si Manny 'Pacman' Pacquiao niadtong milabay'ng Domingo, usa ka construction worker ang gituuhang giatake sa sakit ug namatay atubangan mismo sa telebisyon.

Ang biktima giilang si George Bugna, Sr.47, kinsa driver sa usa ka construction firm ug nagpuyo diha sa sitio Dakit sa barangay Kabituonan sa dakbayan sa Toledo.

Ang asawa sa biktima nga si Lydia kinsa nakahinabi sa DyLA kagahapon mitug-an nga kalit lang nga migahi ug miungot ang baba sa biktima human kini magmustra sa aksyon sa boksing nila ni Pacquiao ug Erik Morales.

Nianang tungora ang iyang bana uban sa iyang mga anak nag-alirong sa atubangan sa ilang telebisyon niadtong tungora, gani si Bugna nagyaka lang sa sawog ug nagkisi-kisi sa kalipay matag mobarag si Morales inig kaigo sa kumo ni Pacquiao gikan pa sa pagsugod sa round hangtud sa third round.

Matud pa migahi ang lawas sa biktima ug nahagba sa salog human usab mapalid sa katapusang sukmag ni Pacquiao si Morales kinsa niadtong tungora nayaka ug mipakita na og disgustong di na mopadayon og away sa Pinoy boxer.

Nagtuo ang mga anak ni George nga nagkomedya lang kini nga diha sa salog tungod kay iyang kinaiyang lingawon ang mga anak apan dihang wala gyud kini mobangon ila na kining gisusi ug gidala sa Toledo district hospital diin kini gideklarar nga dead on arrival.

Ang insidente wala ma-report ngadto sa kapolisan apan usa ka paryente ni Bugna nga non-uniform-personnel sa Toledo police station nga si Josie Maaba,42, kinsa gikahinabi sa Banat News mitug-an nga lagsik kaayo ang lawas sa namatay ug wala kini balatiang gihambin.

"Di ni siya masakiton, maayo gyud ni siya og lawas wala gyud ni siya sukad maadmit sa hospital tungod sa sakit," asoy pa ni Bugna.

Nagtuo si Maaba nga tungod lang sa sobrang kalipay niini ug dakong pagsuporta kang Pacquiao kinsa midaog usab wala damhang matandog niini ang posibleng sakit nga daan ng diha sa iyang lawas.