Babaye nangihi gitulis hinuon

Usa ka babaye nga nagtuman sa sugo sa lawas gitulis ug gidunggab nga maoy nakaingon sa grabeng pagkaangol niini.

Nahitabo kini sa dalan FF Cruz nga nahimutang duol sa Cebu International Convention Center sa Reclamation Area Mandaue.

Ang biktima mao si Mercedes Toda Parcedones, 28, minyo nga taga Basak, Pardo sa dakbayan sa Sugbo.

Ang nagtulis ug nagdunggab sa biktima wala mailhi hangtod karon nga nagbinugtong nga lalaki nga armado og kutsilyo atol sa hitabo.

Nakuhaan ang biktima og salapi nga P7,300 ug alahas nga mokabat sa P100,000 ang kantidad

Si PO1 Chester Quiros sa kapolisan sa Presinto 1 sa Centro Police Station nga gikahinabi sa Banat News miingon nga kuyog sa usa ka Myraflor Cabahug nga taga Paknaan ang biktima.

Dugang pa niya nga nagluwan ang mga biktima sa kotse nga Toyota nga nagdala sa plate number nga GBJ 853 nga gimaneho ni Cabahug.

Base sa ilang imbestigasyon si PO1 Quiros miingon nga ang biktima nga dihang nagtuman sa sugo sa lawas kalit lang migawas gikan sa kasagbutan ang wala mailhing lalaki.

Dugang pa niya nga gitionan ang biktima sa kutsilyo ug gidunggab dayong sakiyo sa salapi ug mga alahas ug dali usab nga misibat pahilayo.

Dali nga nakatubag sa maong alarma sila si PO2 Renato Albuera, PO2 Dioneso Cabotaje ug mga kauban sa maong alarma apan nakasibat na ang nagtulis sa biktima.

Matud pa ni PO1 Quiros nga ang biktima kinsa nakabaton og samad dinunggaban sa iyang dughan ang kasamtangang nagpaalim karon sa Chong Hua Hospital sa dakbayan sa Sugbo.