5FTP gidisarmahan

Lima ka Field Training Policemen (FTP) gikan sa Police Regional Office-6 gipadisarmahan sa hepe sa kapolisan sa Lapulapu kagahapon sa buntag human giingong nagpabuto tungod sa kahubog.

Ang gipadisarmahan mao sila si PO1 Ken Filarmeo, PO1 John Predic Padilla, PO1 Robert Magturo, PO1 Dexter Vegafria ug PO1 Crispin Cajelo, pulos FTP personnel gikan sa PRO-6 nga nadestino sa Lapulapu alang sa nagsingabot nga Asean summit.

Base sa imbestigasyon sa Lapu-Lapu City Police Office nasayran nga usa ka Noel Alsisto, residente sa sitio Matumbo, Seawage, Pusok, Lapu-Lapu mitumbok ngadto sa mga FTP personnel nga maoy nagpabuto ngadto kanila sa dihang naglingkod kini daplin sa dalan.

Matud pa ni Alsisto nga gikan ang mga FTP sa panimalay sa iyang kauban nga FTP nga nag-inom ug sa dihang nahubog na kini namauli na. Apan pag-abot sa ilang tungod ni Alsisto kalit lamang nabati ang usa ka masipang buto gikan sa mga grupo sa FTP hinungdan sa pagpanagan sa mga residente sa maong dapit sa kahadlok nga mapagan sa mga bala.

Kagahapon sa buntag human gipatawag ni Lapulapu City Police Chief, Supt. Louie Oppus, mimando kining disarmahan ang lima ka FTP ug gipaubos sa camp restriction samtang pending pa ang ilang kasong kriminal nga grave threats ug alarm and scandal, samtang ang kasong administratiba hunahunaon pa ni Supt. Oppus unsay isilot.