Nanulong sa silingan gi-shotgun

Gipusil patay ang usa ka giingong hubog nga lalaki kinsa nagdala og sundang nga nanulong sa iyang silingan dihang gi-shotgun human wala mopatuo sa pagbadlong diha sa Sitio Cabugon, Guadalupe, bukirang bahin 10 kilometro ang gilay-on sa Poblacion Alegria

Ang gipusil mao si Pedro Enclunar 54, minyo lomulopyo sa maong dapit kinsa namatay dihadiha gumikan sa daghang samad nga naangkon sa kalawasan agi sa shotgun.

Ang gitumbok nga mipusil mao si Gaudencio Villa Badayos 37 minyo ug silingan sa biktima kinsa nadakpan sa kapolisan sa sulod sa ilang pinuy-anan.

Nakuha sa mga polis sa crime scene ang duha ka slug sa bala sa shotgun, usa ka magazine homemade shotgun duha ka empty shell ug usa ka buhing bala sa 12 gauge sa shotgun.

Ang deputy Chief nga si SPO4 Patrocinio Baylosis mitug-an sa Banat News nga kining biktima gihulagway nga komedyante ilabi kon mahubog.

Apan niadtong higayona giingong nagdala kini ug sundang nga misulong sa balay sa suspek dayong panghagit niini.

Matud ni Baylosis nahadlok ang asawa sa suspek hinungdan nga iyang gibadlong ang biktima apan wala kini mopatuo hinungdan nga gipasalbahan sa makausa. Sa ikaduha gipusil na gyud ang biktima.

Ang biktima nakaangkon ug daghang samad sa dughan ug uban pang parte sa kalawasan agi splinter nga maoy nakaingon sa iyang kamatayon.