Gipusil kadaghan una pa gi-ulo

Gipusil una makadaghan sa likod dayong gitiwasan sa ulo nga nakaingon sa kamatayon sa usa ka 30 anyos nga bag-uhay pang nakagawas sa prisuhan kinsa gipusil sa duha ka wala mailhing mga lalaking luwan sa usa ka motorsiklo diha sa dalan Colon sa Kalubihan ning dakbayan.

Ang gipatay giilang si Jojo Avis, taga Duljo-Fatima. Si Avis nakaangkon og daghang samad pinusilan sa iyang likod ug sa luyong bahin sa iyang ulo agi sa kalibre .45 nga pistola.

Ang mga suspek gikatahong luwan og usa ka motorsiklo diin ang backrider maoy mipaulan og bala sa biktima.

Sa imbestigasyon ni SPO3 Alex Dacua sa Homicide Section kasamtangang nagbarog-barog ang biktima diha sa maong dapit dihang miduol ang usa ka motorsiklong luwan ang mga suspek.

Gikatahong mikanaog ang backrider ug miduol sa biktima dayong pusil sa likod niini makadaghang higayon hinungdan sa pagkahagba ni Avis diha sa kalsada.

Sumala pa sa mga nakakita, ang suspek miduol pa sa biktimang nahapla ug giusban og pusil ang walang sintido ug sa luyong bahin sa ulo niini agi'g pagsigurong mapatay gyud kini.

Human sa pagpamusil yanong milakaw ang suspek balik sa nagpaabot nga kaubang maoy nagmaneho sa motor dayong ikyas subay sa dalan Colon.

Si SPO3 Alex Dacua mitug-an sa Banat News nga niadtong milabayng semana pa nakagawas sa Bagong Buhay Rehabilitation Center ang biktima tungod sa kasong paghupot og kutsilyo.

Sumala pang Dacua, ang nakadakop kang Avis mao ang gipatay usab nga tanod sa Kalubihan nga si, Alfredo Anuba niadtong milabayng buwan human kini pusila ni Nilo dela Cerna atubangan sa asawa niini.

Matud pang Dacua, nakadawat siya og impormasyon nga si Avis maoy gidudahang suspek sa usa ka pagpanulis diha sa karaang edipisyo sa SSS diha sa dalan P. del Rosario apan dili pa makumpirmar ang maong taho.

Usa ka sakop sa anticrime group nga giilang si Rodulfo Guarino maoy mitunol sa mga polis sa upat ka basiyo sa kalibre 45 nga bala ug duha ka slug nga giingong diha sa crime scene samtang dugang sa narekober, duha ka napilo nga slugs ug usa ka kutsilyong 13 pulgadas diha sa hawak ni Avis.

Dili hinuon mokumpirmar si Dacua kun mga vigilante ang mitumba sa biktima sanglit wala siya'y ` nadawat nga taho nga giingong nag-bonnet ug nag-helmet ang mga suspek nga sagad nga buhaton sa maong grupo.