Apan ang maong insidente bag-uhay pang gitug-an ngadto sa kapolisan.
Si Ireneo Formentera, security guard sa maong kompaniya ang mitaho sa maong insidente sa kapolisan sa Talisay.
Nadala sa wala mailhing kawatan ang 50 pairs x 24 gauge nga dunay gitas-ong 70 metros ug 20 pairs x 24 gauge nga dunay gitas-ong 160 ka metros.
Niadtong Martes sa kaadlawon gikawat usab sa wala mailhing kawatan ang kable sa PLDT diha sa Barangay Cansojong.
Si Noel Pedrosa, security guard usab sa kompanya, ang mitaho usab sa maong insidente sa kapolisan sa Talisay.
Nadala sa wala mailhing kawatan ang 300 pairs X 24 gauge nga dunay 52 metros ang gitas-on ug 100 pairs x 24 gauge nga 52 metros usab ang gitas-on.
Sa milabay'ng upat ka buwan kuyanap kaayo ang insidente sa kawat sa dakbayan.
Makita sa talaan sa kapolisan sa siyudad nga kasagarang kawaton ang mga metro sa tubig ug mga kable sa kuryente ug telepono.
Apan niining bag-o lang, pagpanglungkab sa mga balay ang usa sa dakong problema sa kapolisan ug mga dagkong kantidad sa alahas, salapi ug mga butang ang madala sa mga wala mailhing kawatan gikan sa mga biktima.
Kahinumduman nga si Police Superintendent Romeo Perigo, hepe sa kapolisan sa siyudad, nagkanayon nga tungod sa kalisod sa ekonomiya karon ang hinungdan nga kuyanap kaayo ang insidente sa kawat.
Kasagaran sa mga suspetsado walay laing panginabuhian hinungdan nga mapugos kini og buhat og krimen.
Apan dunay mga tawo nga magbuhat og krimen tungod sa ilang bisyo.
Ug kung masulbad ang problema sa ekonomiya posibleng mohinay ang mga krimen nga mahitabo.