Scholarship gipasalig sa Singaporean government

Libreng pagtungha alang sa mga kwalipikado nga estudyante dinhi sa Sugbo gitanyag sa Singaporean Government.

Kini maoy gitug-an sa mga kadagkuan sa Singaporean Embassy dinhi sa Pilipinas ngadto ni Bokal Juan Bolo.

Matud pa, ang mao nga libreng pagtungha alang unya kini sa pag-abli sa school-year 2007-2008 ug abli kini sa tanang kurso gawas lamang sa kursong medisina ug dentista.

Tungod niini, si Bolo mopasa og resolusyon atol sa ilang regular nga sesyon karong adlawa aron awhagon ang mga Sugboanon sa pagdawat niining oportunidad ilabina sa mga batan-on nga mogradwar sa high school karong Marso sunod tuig.

Matud pa ni Bolo usa kini ka nindot nga oportunidad nga gihatag ug gitanyag alang sa mga Sugboanon, "to avail of a free college education and at the same time to broaden their horizons and meet people of a different culture".

Gidugang pa ni Bolo nga misalig ang kagamhanang Singapore tungod sa katakus sa natad sa edukasyon ug na- probaran na gayod nga daghang Sugbuanon ang misulbong sa bisan unsang kahibalo sa gawas sa nasud.

Malaumon si Bolo nga daghan ang moaplay niini ug makapahimulos niining oportunidad alang sa mga Sugbuanon.