Pangilin sa Birhen sa Regla

Ang mga Oponganon magsaulog na usab sa tinuig nga pangilin karong Lunes ug Martes, Nobiyembre 20 ug 21 sa Birhen sa Regla, ang milagrosong patron sa dakbayan nga gideboto sa liboan ka mga Katoliko sa Sugbo.

Base sa kasaysayan, ang imahen sa Birhen sa Regla gidala sa usa ka pari nga Agustino nga si Padre Francisco Availe kinsa nakigkita sa kadagkoan sa simbahan sa Opon alang sa paghukom sa mahimo niining patron.

Nahitabo kini dihang ang tibuok nasud nga Pilipinhon ubos na sa pagdominar sa mga Katsila nga niadtong panahona ang mga lumolupyo daan na nga magsayawsayaw sa atubangan sa estampa sa Mahal nga Birhen dela Regla.

Si Padre Availe nga usa ka paring Agustino nga nagsunod sa pamalaod sa Augustinian Order ang nagbalaan usab sa Mahal nga Birhen sa Regla.

Sa atubangan sa mga Oponganon niadtong panahona iyang isaysay ang kaagi sa Birhen sa Regla ni San Agustin nga usa ka Obispo sa Hippo kinsa maoy mangunay sa pagbuhat og mga itom nga larawan nga sama kaitom sa katawhan sa Tagaste, Africa.

Ang maong larawan sa Birhen sa Regla kanunay kini niyang ibutang sa iyang atubangan sa panahon sa iyang pagpanukiduki nga may kalambigitan ang Kristohanong pagtuo.

Namatay si San Agustin sa tuig 430 AD ug ang uban pang mga obispo nga nagsunod kaniya maoy nagpadayon sa mga balaod nga iyang gilatid ug gipadayon usab nila ang pagdebosyon sa Mahal nga Birhen sa Regla.

Daghan ang mga ngalan nga gibunyag sa maong imahen - adunay Birhen Libica, Birhen del Sagrario, Birhen La Morena, Estrella Delos Mares ug Nuestra Senora Birhen dela Regla.