'Look-out' sa tulisan nadakpan

Gidudahang back-up ug maoy gitumbok nga look-out sa duha ka mga tulisang misulod ug mitulis sa Kay Dot Net nga duna say cellshop diha sa dalan Salinas Drive sa Lahug ang nadakpan sa mga sakop sa Theft and Robbery Section kapin duha ka oras human sa pagpanulis.

Ang suspek giilang si Alejandro Lagon Jr. 22, taga Peace Valley sa barangay Lahug ning dakbayan kinsa usa ka habal-habal driver.

Ang grupo nila ni Sr. Inspector Michael Anthony Bartes mihimo og follow-up operation human tulisa sa tulo ka mga lalaki ang maong internet ug cellshop diin nakuha ang gibana-banang kapin P60 mil nga kantidad sa mga mahalong cellular phone ug cash.

Si Lagon dihang gipakita sa usa sa mga testigo sa insidente, positibo kining gitumbok nga mao ang lalaking nagmaneho sa kolor pula nga motorsiklong giluwanan sa duha ka armadong tulisan.

Apan ang suspek sa pakighinabi sa mga tigbalita kusganong mihimakak sa pasangil ug mitug-ang igo lang siyang nagpatubil og gasolina diha sa usa ka gasolinahan sa dalan General Maxilom Avenue sa barangay Zapatera dihang kalit nga giduol sa mga polis ug gidala sa ilang buhatan diin siya gitumbok nga suspek.

Ang duha ka mga wala mailhing tulisan nga nakaikyas parehong armado dihang misulod sa maong internet café ug gibuak ang glass showcase ug gipanguha ang mga baligyang cellphone ug ang cash sa kahera.