Submarine cables gibantayan aron masegurong way 'brown-out' sa Summit

Hugot nga gibantayan karon ang submarine cable sa Leyte-Cebu Power Interconnection Project sa National Transmission Corporation.

Kini aron pagseguro nga walay dautang mahitabo sa maong interconnection nga gipaagi sa kadagatan samtang nagsingabot ang 12th Association of Southeast Asian Nation Leaders' Summit karong Disyembre 11 hangtod 14.

Matud pa ni Engr. Crispin Lamayan, assistant vice president for systems operation sa Transco-Visayas, nga nakig-alayon sila sa Philippine Navy alang sa paghatag sa seguridad sa submarine cable.

Ang Philippine Navy ang gitahasan sa pagpatrolya taliwala sa kadagatan sa Tongonon, Leyte ug Daanbantayan, Cebu.

Labing dako nga supply sa kuryente sa Sugbo lakip na sa Negros ug Panay nagagikan sa maong interconnection project.

Matud pa ni Lamayan nga dili sila maka-ako nga dunay pagkapakgang sa supply sa kuryente atol sa Asean Summit.

Gani sumala pa ni Lamayan nga ang power barge sa isla Mactan nga dad-on unta sa lalawigan sa Iloilo human kini gipaayo ang gipugngan una nga magpabilin sa Mactan aron makadugang pa gyud sa supply sa kuryente sa Sugbo.

Ang maong power barge makahatag og 20 ngadto sa 25 megawatts nga supply sa kuryente alang sa mga hotels sa isla sa Mactan.