ASEAN leaders sayong moabot

Nia na sa Sugbo ang pipila ka pangulo sa kanasuran nga sakop sa Association of Southeast Asian Nations labing sayo karong Disyembre 8 sa dili pa ang ilang tigum sa Disyembre 11 hangtod 14 sa 12th Asean Summit.

Ang mga pangulo sa kanasuran sa ASEAN motambong sa mga kalihukan sa Asean Business and Investment Summit nga himoon sa Disyembre 7 hangtud 10 sa Waterfront Cebu City Hotel.

Atol sa pormal nga paglusad sa ASEAN BIS 2006 kagahapon, nasayran nga si Presidente Gloria Macapagal Arroyo sa Pilipinas ang keynote speaker unya sa Disyembre 10 samtang ang mga heads of states mopadangat usab sa ilang tagsatagsa ka mensahe.

Wala pa hinoon makompirmar kon kinsa nga mga heads of states ang makatambong sa kalihukan.

Apan gawas sa mga sakop sa ASEAN, motambong usab ang mga primero ministro sa mga dialogue partners sama sa mga nasud sa China, Japan ug Korea ug mopadangat usab sa ilang mensahe.

Ang chairman sa ASEAN Business Advisory Council, Jose Concepcion Jr. nipadayag nga ang nag-unang tumong sa upat ka adlaw nga tigum sa mga negosyante mao ang pagpalambo sa economic integration sa rehiyon.

Ang mga nasud nga sakop sa ASEAN region naglangkub sa Brunei, Cambodia, Indonesia, Laos, Malaysia, Myanmar, Singapore, Thailand ug Vietnam.