Libreng tungha para sa mga kabus

Maayong balita! Ang Departamento sa edukasyon dinhi sa siyudad sa Sugbo mopaangay na og libreng edukasyon niadtong mga bata gikan sa kabus nga pamilya nga wala makatungha o ba kaha napugos sa pag-undang sa pagtungha.

Ang Department of Education Cebu City School Division pinaagi ni Dr. Vicky Veloso, ALS Supervisor midasig sa mga kabus nga ginikanan pagpatungha sa ilang mga anak ubos ning maong programa.

Ang ALS nga gitawag og Alternative Learning System (ALS) nagtugot sa mga drop out nga tinun-an nga nagpangidaron og 14 anyos paubos pagkuha og pasulit sa A and E test aron makakuha og diploma sa elementarya ang maong tinun-an aron maoy basihan sa pagpa-enroll sa high school.

Samtang kadtong nagpangidaron og 15 anyos pataas makahimo nang maka- pa-enroll sa kolehiyo ug makapili og kurso kun makapasar sa maong pasulit.

Niadtong miaging tuig, matud ni Veloso miabot og usa ka libo ka mga drop out ug out of school youth dinhi sa dakbayan ang nanguha sa maong pasulit ug 55 porsyento niini ang nakapasar sa A and E test alang sa Elementarya ug 65 porsyento ang nakapasar alang sa high school ug nakatungha na karon sa kolehiyo.

Aron mas modaghan pa ang mga mopa-enroll karong tuiga ang mga tinugyanan sa DepEd dinhi sa dakbayan padayon karong nakig-alayon sa mga district coordinators ug mobile teachers aron mopahigayon og house-to-house nga kampanya sa kabarangayan. "This is a very good program which (has) benefited thousands already. People should take advantage of this opportunity," dugang asoy ni Veloso.