Pasidaan sa CCPO atol sa boksing ni Pacman ug Tereble ugma

Mopagawas og memorandum karong adlawa ang Cebu City Police Office ngadto sa tanang police station ug special units nunot sa panagsangka ni Manny Pacquiao ug Erik Morales ugmang adlawa aron did-an ang kapolisan sa pagbiya sa ilang mga pwesto ug pagdili kanila sa paglambigit sa pustahay samtang naa sa trabaho.

Si Supt. Pablo Labra mitug-an sa mga tigbalita nga ang maong memorandum agi'g pagpahimangno sa mga polis nga dili mabutang sa kauwawan o ba kaha makasuhan og abandonment of post tungod lang sa maong boksing.

Samtang butangan usab og mga polis ang mga dapit diin dunay mga pay-per-view nga mga live coverage sa cable television sa mga dapit dinhi sa dakbayan.

Kini bisan pa man walay bisan usa ka mga nag-organisa niini ang nangayo og seguridad sa CCPO aron mobantay kanila atol sa maong boksing.

Usa sa mga butangan og mga polis mao ang New Cebu Coliseum diha sa dalan Sanciangko aron kapugngan ang posibleng kagubot nga mahitabo.