100 na ang gi-dengue sa Talisay ning tuiga

Dul-an sa 100 ang nahitabong kaso sa dengue sa siyudad sa Talisay gikan sa buwan sa Enero hangtud sa Oktobre niining tuiga.

Base sa talaan sa Talisay City Health Office, usa ang namatay sa maong mga biktima kinsa wala pay usa ka tuig ang panuigon niini.

Si Mariane Lamostre, taga Barangay Pooc, ang namatay niadtong buwan sa Enero.

Ang mga nabiktima nagpanuigon gikan sa wala pay usa ka tuig hangtud sa 59.

Ang Barangay Tabunok maoy dunay pinakataas nga insidente sa dengue diin adunay natalang 17 ka biktima, nagsunod ang San Roque ug Lawaan diin ang maong mga barangay adunay napulo ka biktima, Cansojong walo, Pooc, pito, Lagtang, unom, San Isidro, lima, Poblacion, Tanke, Dumlog, Mohon, Bulacao, Laray, Maghaway Nonoc ug Candulawan.

Ang mga mosunod nga barangay adunay mga biktimang duha, usa, upat, tulo ug lima.

Bag-o lang, si Konsehal Sergio "Serie" Restauro kinsa tsirman sa panglawas mipahugot sa ilang kampaniya batok sa dengue human ang Regional Epidemiology and Surveillance Unit 7 mipagawas og taho nga adunay 81 ka kaso sa dengue sa siyudad sulod sa buwan sa Enero hangtud Septiyembre niining tuiga.

Ang siyudad naalarma sa maong taho hinungdan nga ang grupo ni Restauro mipahigayon og "fogging" o paaso sa mga barangay sa siyudad gamit ang "mist blower".