Mga delegado sa provincial meet luwas — Binghay

Gipasalig ni Balamban Mayor Alex Binghay nga luwas ang mga delegado sa labing unang Cebu Provincial Sports, Cultural and Academic Festival nga ipahigayon sa ilang lungsod karong Nobiyembre 19 hangtud 24.

Matud pa ni Binghay nga gipangandaman na nila ang paghatag og seguridad sa mga delegado gikan sa 47 ka lungsod sa lalawigan sa Sugbo.

Gibana-bana nga moabot sa 5,000 ka mga atleta ang mosalmot sa kalihukan gikan sa 47 usab ka teams.

Si Binghay nipadayag nga dili sila gusto nga dunay dautang panghitabo nga motumaw atol sa festival ug dili usab sila gusto nga dunay mawagtangan sa ilang mga butang nga mga atleta nga maoy sagad mahitabo sa ubang lugar.

Ang Festival mao ang naandan nga Provincial Athletic Meet sa Department of Education matag tuig apan gibag-o kini sa pagkakaron.

Tuyo niini nga makapasundayag ang matag lungsod sa tagsatagsa nila ka festival ug dili lang sa natad sa sports kun dili lakip na ang kultura ug academic.

Matud pa ni Provincial Schools Division Superintendent Recaredo Borgonia nga kini ang labing unang festival sa Central Visayas.