Kaso ni Loot gipakatulog sa Sandiganbayan

Gipakatulog sa Sandiganbayan ang kasong kriminal nga giatubang ni Daanbantayan Mayor Maria Luisa Loot usa na ka tuig ang nakalabay.

Gibaliwala sa Third Division sa Sandiganbayan ang duha ka endorsements ni Chief Justice Artemio Panganiban ingon man ang laing endorsement sa Department of Justice nga gipirmahan ni Assistant Secretary Teresita Reyes-Domingo.

Ang kihante nga si Jeronimo Cosido nalipay nga nasang-at na sa Sandiganbayan ang kasong kriminal nga iyang giduso sa buhatan sa Ombudsman-Visayas batok kang Loot.

Si Loot nakapiyansa og P30,000 sa dihang dakpon na unta siya sa operatiba sa National Bureau of Investigation pinasikad sa warrant of arrest nga giluwatan ni Associate Justice Godofredo Legaspi.

Si Cosido kawani sa munisipyo sa lungsod sa Daanbantayan sa dihang nisang-at siya og kaso batok kang Loot niadtong Oktobre 8, 2003.

Giingong napagan lang si Cosido sa away tali sa iyang igsoon nga si Bartolome Cosido nga usa ka negosyante ug ni Loot.

Matud pa ni Jeronimo nga gamiton unta siya ni Loot aron dauton ang iyang igsoon apan wala siya nisugot hinungdan nga gilisud-lisud siya sa trabaho ug wala na hatagi sa iyang sweldo.

Gihatagan og gibug-aton ni Graft Investigator Charina Navarro-Quijano ang reklamo ni Cosido hinungdan nga napasaka gyud ang kasong kriminal ngadto sa Sandiganbayan.