Mga ospital andam sa summit

Preparado na ang mga pribado ug publikong tambalanan dinhi sa dakbayan sa Sugbo pagtambal niadtong mga tawo nga mabiktima sa bisan unsang panghitabo kun ugaling dunay mga aksidente nga motumaw atol sa upat ka adlaw nga Asean summit.

Kagahapong adlawa nakigtagbo sila si Konsehal Cristopher Alix, tsirman sa Committee on Health sa konseho sa siyudad ug si Dr. Expedito Medalla, hepe sa Health Emergency Management Coordinating Staff sa DOH-7 ngadto kang Mayor Tomas Osmeña aron pahibaw-on ang mayor sa mga pagpangandam nga ila karong gihimo.

Matud sa konsehal napahibalo na nila ang mga pribadong tambalanan sama sa Cebu Doctor's Hospital, Perpetual Soccour, Chong Hua Hospital, Community Hospital, South ug North General Hospital alang sa maong katuyoan.