Matud pa ni Belmonte nga andam sila nga moserbisyo sa mga Sugbuanon atol sa Asean summit kana kon itugot ni Presidente Gloria Macapagal-Arroyo nga i-exempted sila sa holiday gumikan sa summit.
Dako og epekto sa koleksiyon sa customs ang upat sa adlaw nga holiday, sumala pa niya, gumikan kay nag-apas sila sa ilang matag bulan ug tinuig nga target koleksiyon nga moabot sa P5.3 bilyones. Gani ang ilang target collection matag adlaw moabot ngadto sa P15 ngadto sa P16 milyones diin moabot ngadto sa P60 ngadto sa P80 milyones ang mawagtang sa panudlanan sa gobyerno sa maong upat ka adlaw nga holiday.
Hinuon sa ilang panagtagbo unya ni Customs Commissioner Napoleon Morales ilang tan-awon ang mga alternatibo sa pagsulbad sa maong problema sa koleksiyon.
Si Belmonte naglaraw usab nga makigkita nila ni Mayor Tomas Osmeña, Mayor Thadeo Ouano, Mayor Arturo Radaza ug Gobernador Gwendolyn Garcia lakip na ang mga brokers, importers ug exporters aron mahisgutan ang mga pamaagi nga dili maapektahan ang operasyon sa Customs.
Usa sa gikabalak-an ni Belmonte mao ang kalangay unya sa mga kargamento nga i-deliver ngadto sa mga consignee gumikan sa hugot nga seguridad ug pipila ka oras nga pagpatak-op sa kadalanan nga agian sa mga delegado bisan pa sa panahon sa kagabhion.