P500T para insular prisoner ok ni Tom

Misukwahi ang mga giluwatang pamahayag ni Mayor Tomas Osmeña nga mibahad nga dili gyud mohatag og suporta ngadto sa Bureau of Jail Management and Penology (BJMP) hangtod nga dili masumpo ang naghitak nga korupsyon ug anomaliya diha sa Bagong Buhay Rehabilitation Center (BBRC) nga iyang gituohan nga gilambigitan sa mga jail personnel ug kadagkuan sa BJMP.

Atol sa press conference kagahapon sa udto giklaro ni Osmeña nga iyang aprobahan ang napasar nga resolusyon sa konseho nga nagtugot alang sa paghatag og P500 mil sa siyudad aron igasto sa pag-transport sa 180 ka mga insular prisoner sa BBRC ngadto sa New Bilibid Prison sa Muntinlupa.

Matud ni Osmeña kanunay niyang aprobahan ang mga request sa BJMP alang sa pletehan pagpadala og piniriso sa BBRC ngadto sa Muntinlupa.

Kini maoy hinungdan nga gikahibulong og dako sa mayor kun nganong hangtod karon duna pay mga nagpabiling piniriso diha sa BBRC nga gitakda na untang ipadala sa Muntinlupa.

Si Osmeña mibahad nga dili motabang bisan pagpagamit sa Kaohsiung bus sa siyudad sa himuong pag-balhin sa kapin sa 2,000 ka mga piniriso sa BBRC ngadto sa Kalunasan jail tungod sa wala masumpo nga korupsyon sa maong bilanggoan ug ingon man gikabalak-an sa mayor ang seguridad sa mga molupyo sa Kalunasan sa higayon nga mabalhin sa maong lugar ang mga piniriso.

Ang labing uwahing kontrobersiya nga nahibaw-an sa mayor mao ang taho nga ka piniriso nga sila si Allan Mosqueda ug Carlos Dy nga giingong misuborno og P40 mil ngadto sa warden hinungdan nga hangtod karon wala gyud kini mapadala didto sa Muntinlupa.