PUJ ug taxi gidid-an na mamasahero sud sa MEPZ 1

Philippine Economic Zone Authority kun PEZA dili na mopasulod og mga PUJ nga nagbiyahian sud sa compound sa MEPZ I ug taxi units sugod kagahapon sa buntag.

Human makadawat ang Banat news ug daghang reklamo sa mga trabahante sa MEPZ I diin sila gipakanaug halayo sa gate gumikan kay dili na makasud ang mga PUJ multicab drivers sa MEPZ.

Usa sa MEPZ Police (dili magpaila) ang nahinabi sa Banat News kini maoy bag-ong polisiya nga gihatag ni PEZA Administrator Sansaluna Pinagayao nga gisugdan dayon og implementar ni Maj. Edgardo Fulay ang PEZA Police District Commander.

Tungod niini, ang mga pasahero kutob lamang sa gate sa MEPZ diin gibanabana nga adunay gilay-on nga 100 ngadto sa 200 metros gikan sa unloading area ug maglakaw nalang ngadto sa ilang tagsatagsa ka kompaniya nga gitrabahoan.

Base sa pamahayag sa maong tinubdan adunay mga sakyanan nga gihatagan og pagtugot sa PEZA nga maoy mopasakay sa mga pasahero o mga trabahante nga magpahatod gikan sa gate ngadto na sa ilang tagsatagsa ka mga kompaniya nga gialagaran sud sa MEPZ diin kini mobayad og 4 pesos matag usa niini.

Ang maong mga PUJ sud sa PEZA dili makagawas sa maong compound ug kini pagasaw-on sa mga PUJ sa gawas nga bahin sa gate ngadto na sa ilang tagsatagsa ka mga destinasyon.

Matud sa pipila ka mga trabahante nga nahinabi sa Banat News kung kini adunay kalambigitan sa ASEAN Summit manghinaut sila nga human sa maong summit ibalik sa PEZA administration ang daang rota sa mga PUJ nga nagbiyahe sud sa MEPZ.