Road test andam na — CCPO

Mipasabot si acting Cebu City Police Office director Melvin Gayotin nga andam na sila sa umaabot nga "road test" alang sa route security sa umaabot nga Nobiyembre 25 agig pagpangandam sa ASEAN summit karong sunod bulan.

Si Gayotin nagkanayon nga ipakatap ang tanang mga hiniusang police units sa dakbayan sa mga dapit diin subayan sa ceremonial route sa mga delegado.

Ang maong road test gihimo aron matino kung unsa pay kinahanglang usbon ug palambuon sa siguridad sa kalihukan sa mga ASEAN leaders.

Ang gitudlong Traffic Task Group commander nga si Sr. Inspector Jonathan Abella uban sa mga kadagkoan sa Police Regional Office 7 nga panguluhan ni Chief Supt. Silverio Alarcio Jr. maoy mohimo sa maong road test.

Matud pang Gayotin lakip sa susihon sa kaandam mao ang mga secondary routes kon kadtong mga alternatibong dalan nga tahakon sa convoy sa mga delegado kung ugaling dunay aberiyang mahitabo sa orihinal nga rota.

Gipaabot nga dako kaayo ang epekto niini sa dagan sa trapiko sa dakbayan sanglit dili pasudlan og bisan unsang mga sakyanan ang maong mga rota.